У Смаргоні будзе ўстаноўлена мемарыяльная дошка заслужанаму дзеячу культуры Беларусі, Ганароваму грамадзяніну горада Аляксандру Дзяругу (1901-1979), паведаміла карэспандэнту БЕЛТА начальнік аддзела культуры Смаргонскага райвыканкама Таццяна Ражава.
Аўтар праекта - вядомы беларускі скульптар Уладзімір Церабун. Мемарыяльная дошка будзе ўстаноўлена па ініцыятыве грамадскасці горада. Фінансаванне работ па яе вырабу будзе весціся за кошт добраахвотных ахвяраванняў грамадзян і сродкаў рэзервовага фонду Смаргонскага райвыканкама. Устанавіць яе плануецца летам бягучага года на будынку былога Дома піянераў, дзе некалькі гадоў працаваў Аляксандр Дзяруга.
Аляксандр Дзяруга нарадзіўся ў Мінску. У 1937 годзе пераехаў у Смаргонь, дзе працаваў дырэктарам, пазней мастацкім кіраўніком Смаргонскага раённага Дома культуры. Народныя песні і беларускія мелодыі, запісаныя ім на Смаргоншчыне разам з Рыгорам Шырмай і Генадзем Цітовічам, увайшлі ў рэпертуар вядучых калектываў рэспублікі. Арганізаваў у Смаргоні цымбальны аркестр, які за высокае прафесійнае майстэрства атрымаў званне "народны". Калектыў плённа працуе і цяпер і носіць імя Аляксандра Дзяругі.