Актывісты Моладзі БНФ са Смаргоні правялі акцыю да гадавіны сьмерці Кастуся Каліноўскага. У горадзе на дрэвах зьявіліся імправізаваныя шыбеніцы з надпісам "Пятля на шыі самасьвядомасьці. 22 сакавіка быў павешаны Кастусь Каліноўскі". Людзі змаглі ўбачыць "шыбеніцы" ў гарадзкім парку, ля чыгуначнага прыпынку, ля адной са школаў горада.

Актывісты Смаргонскай суполкі Моладзі БНФ працягваюць доўгатэрміновы маратон па вывешваньні нацыянальных сьцягоў у розных раёнах свайго гораду.
Гэтак 19 сакавіка чарговы бел-чырвона-белы штандарт зьявіўся над дахам аднаго з жылых будынкаў у гонар удзельніка антыкамуністычнага падпольнага вучнёўскага руху ў Смаргоні 1949-1950 гг Эдуарда Сташкевіча.

21 лютага з нагоды Міжнароднага дня роднай мовы актывісты Моладзі БНФ са Смаргоні павіншавалі жыхароў гораду з гэтым сьвятам вывешваньнем бел-чырвона-белага сьцягу і распаўсюдам улётак з наступнымі пажаданьнямі:
"Зычым Вам хутчэй адчуць подых самасьвядомасьці і ўбачыць у сабе БЕЛАРУСАЎ!"

У Смаргоні прайшла акцыя-марафон, прысьвечаная Дню Салідарнасьці. На працягу тыдня ў горадзе (на слупах, інфармацыйных дошках прызначаных для сьпісаў грамадзянаў ў вышуку, на чыгуначных і аўтапрыпынках) актывісты Моладзі БНФ распаўсюджвалі ўлёткі з тэкстам: "Пропал человек", на якіх былі фотаздымкі Ганчара, Захарэнкі, Красоўскага і Завадскага. Мінакі маглі даведацца, хто паказаны на ўлётках, чым займаўся, калі зьнік, куды зьвяртацца, калі ведаеш што-небудзь пра яго.