У Смаргоні прайшла акцыя-марафон, прысьвечаная Дню Салідарнасьці. На працягу тыдня ў горадзе (на слупах, інфармацыйных дошках прызначаных для сьпісаў грамадзянаў ў вышуку, на чыгуначных і аўтапрыпынках) актывісты Моладзі БНФ распаўсюджвалі ўлёткі з тэкстам: "Пропал человек", на якіх былі фотаздымкі Ганчара, Захарэнкі, Красоўскага і Завадскага. Мінакі маглі даведацца, хто паказаны на ўлётках, чым займаўся, калі зьнік, куды зьвяртацца, калі ведаеш што-небудзь пра яго.

4 лютага раніцай актывістамі Смаргоньскай суполкі Моладзі БНФ, з нагоды 200-годзьдзя з дня нараджэньня Вінцэнта Дуніна-Марцінкевіча, на даху пяціпавярховіка быў вывешаны бел-чырвона-белы сьцяг.

Беларусь адзначыла Дзень нараджэння Вінцэнта-Кастуся Каліноўскага. У некалькіх гарадах нашай краіны, у гонар гэтага велічнага БЕЛАРУСА на дахах дамоў былі ўзьняты бел-чырвона-белыя сьцягі. Не стаў выключэньнем і горад Смаргонь. 2 лютага на дроце паміж двума шматпавярховікамі з'явіўся нацыянальны сымбаль Беларусі і расьцяжка з надпісам "02.02.1838 г. Нарадзіўся К. Каліноўскі".
Як паведаміў прэсавай службе Моладзі БНФ старшыня Смаргонскай суполкі Моладзі БНФ Зьміцер Б.: "Добра, што зрабілі фатаздымак да вывешваньня сьцяга, бо з-за моцнага ветру якасныя фатаздымкі не атрымаліся. Тым больш, у хуткім часе сьцяг зачапіўся за дах суседняга дому і зусім "зьнік" з полю зроку мінакоў."

Смаргоньскія актывісты Моладзі БНФ адзначылі Дзень Салідарнасьці з палітвязьнямі, рэпрэсаванымі ды іх сем'ямі. Напярэдадні, 15 студзеня, на даху шматпавярховіка быў узьняты бел-чырвона-белы сьцяг. Нацыянальны сымбаль Беларусі пратрымаўся да дзьвюх гадзінаў наступнага дня, прыцягваючы ўвагу й выклікаючы зацікаўленасьць у мінакоў.
Неўзабаве супрацоўнікі ЖКГ зьнялі сьцяг, але, да ўсеагульнага зьдзіўленьня, не парвалі й ня зьмялі яго, а распраўленым панесьлі праз двары й стадыён, мінуючы сьметніцы, у невядомым накірунку.
Актывістамі Моладзі БНФ г.Смаргоні ў цэнтры горада каля касьцёла былі выстаўленыя партрэты палітвязьняў ды зьніклых грамадзка-палітычных дзеячоў Беларусі. Партрэты прастаялі пэўны час, пакуль іх не забралі супрацоўнікі міліцыі.